原汁原味文章連圖請CLICK
撰文：黃浩晉
稱呼盧冠廷(LoLo)為「行走的音樂百科全書」，相信也沒有人會反對。他對音樂的理解，通透得猶如「音樂Google Map」，精準而且一步到位。與其說筆者跟LoLo做訪問，倒不如說LoLo為筆者上一課「音樂精讀班」更貼切。
各位同學，準備好上堂未？
電影配樂 VS 流行曲創作？
相信不少人與筆者一樣，都是聽流行曲長大，亦大概知道有時候簡單幾個和弦就足建構一首流行曲；那電影配樂又要如何處理？是否一味符合畫面需要就可以，背後運作「冇咁有章法」？豈料答案完全相反。
LoLo認真說：「電影配樂要着重乜嘢Scale(音階)俾乜嘢mood你！電影配樂嘅Chord(和弦)係可以深過你Pop Music嘅Chord好多！」話音一落，LoLo隨即舉出連串例子，果然是「行走的音樂百科全書」。
到底電影配樂用到的和弦，比流行曲所用的有多深奧？LoLo慢慢解釋：「例如Scary(驚慄) Chord你要點做吖？要Augmented chord加個Major 7th，普通人係唔會㗎嘛，但用喺電影就可以出嚟，你先有嗰個mood！實情比起Pop Music係深奧好多。」他續說：「再講下緊張感覺要有咩元素吖？要有Flat 9 ，任何音樂harmonize個Flat 9th都會驚驚地，因為唔harmonize吖嘛。」
註：
Augmented Chord 組成音為：I - III - #V ，如加上Major 7th，則變成：I - III - #V - VII。
以C Augmented Chord 為例，加上Major 7th，組成音則變成：C - E - G# - B。
講完Chord當然要講下Scale(音階)，有別於大家都識唱的「Do Re Mi」，要熟悉其他音諧才能準確地做出想營造的效果：「例如卡通片入面、要上天堂、又或者好驚訝嘅場面，就要用Whole Tone Scale，咁先俾到去咗另一個世界嘅感覺你。呢啲嘢一定要知，唔可以用Major Scale，冇mood㗎！」
註：Whole Tone Scale(全音音階)，以C Key為例，音程為：C - D - E - F# - G# -A# - C
「John Williams寫嘅《Star Wars》配樂點解咁激昂？一定要用Lydian Scale！」
註：以C Lydian Scale為例，音程為：C - D - E - F# - G - A - B - C
「仲有啲一聽就有古代感覺嘅，一定要用Phrygian scale。全部都要知㗎！如果唔係你做唔到真正嘅電影音樂！」
註：以C Phrygian Scale為例，音程為：C - Db - Eb - F - G - Ab - Bb - C
LoLo侃侃而談講出以上例子，雖然只是幾分鐘的一番話，但要理解兼實踐，則全靠多年來的經驗。(江智騫攝)
LoLo侃侃而談講出以上例子，雖然只是幾分鐘的一番話，但要理解兼實踐，則全靠多年來的經驗。(江智騫攝)
Rap Music令新一代唔識寫好旋律？
分享完一些「武功心法」，到底LoLo對現時的主流音樂又有何看法？加上近年「抄歌風波」頻生，是否意味着好的旋律已經「飽和」？LoLo斬釘截鐵說：「唔會㗎！錯誤晒！」
音樂三大元素：Rhythm(節奏)、Harmony(和聲)、Melody(旋律)
LoLo解釋：「80年代開始用電腦製作音樂，有Loop(反覆段落)出現，令好多人唔需要識樂器，都可以叫自己做Composer(作曲家)，因為有個backing俾咗佢，所以作出嚟嘅音樂『冚澎冷』都一樣，開始冇感覺。」他續說：「到90年代Rap Music出現，令大家忽略組成音樂其中一個重要元素—Melody(旋律)，令依家全人類啲後生想作到啲好嘅melody真係難過登天呀！」雖然LoLo認為現時較少優美的旋律出現，不過《大娛樂家》的配樂卻令他喜出望外，大家有興趣亦不妨欣賞一下。
「創意同好嘅旋律係唔會飽和。」(江智騫攝)
「創意同好嘅旋律係唔會飽和。」(江智騫攝)
要「搭通到天地線」先可以感動人
未知大家有否這樣一個經驗，在看演唱會或歌唱節目時，某些歌手「高音甜、中音準、低音勁」，又或者「巨肺」飆高音，你對他的技術為之讚嘆，卻沒有為之動容。LoLo一語道破：「因為佢唱歌唔係from the heart。」他解釋：「因為一個歌手就算技巧有晒都好，都係個腦意識嘅嘢，任何裝飾，即使佢點樣完美，人哋感動唔到㗎，因為係假㗎！但如果你from the heart，係潛意識嘅嘢，呢樣嘢先可以感動到人，搭通到天地線。」
LoLo曾與一些後輩分享，要求他們「唔好諗」，他說：「你一諗就係意識，你會會諗下點樣裝飾個音，唱得長啲、重啲，咁就死喇，變咗完全冇感覺！First take係最好㗎，個個都係！」他亦指出，這正正是某些歌手唱Live的表現比錄音室版本更好，因為機會只得一次，迫使人集中出盡全力去演出。
要做到「從心出發」的確知易行難，LoLo亦笑言：「其實一啲人係知道㗎，但係佢都唔理，係都要『諗住』，個個都係咁㗎喎！冇辦法，哈哈！」
